Published on MAPNews (https://preprod.mapnews.ma/am/)

Accueil > ⴰⵏⵎⵓⴳⴳⵯⴰⵔ ⵏ ⵜⴼⵙⵓⵜ ⵉ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⴳ ⵜⴼⵔⴰⵡⵜ

ⴰⵏⵎⵓⴳⴳⵯⴰⵔ ⵏ ⵜⴼⵙⵓⵜ ⵉ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⴳ ⵜⴼⵔⴰⵡⵜ

25 ⵉⴱⵔⵉⵔ 2019 Version Imprimable
ⵜⴰⴼⵔⴰⵡⵜ - ⵔⴰⴷ ⵜⵙⵏⵎⴰⵍⴰ ⵜⵎⵙⵎⵓⵏⵜ ⵏ ⵓⵏⴰⵔⵓⵣ ⵉ ⵜⴳⵎⵉ ⴷ ⵓⵎⵙⴰⵡⴰⴹ ⴰⴷⵍⵙⴰⵏ, ⵜⴰⵙⵓⵜⵍⵜ ⵜⵉⵙⵙ ⴽⵕⴰⴹⵜ ⵏ ⵓⵏⵎⵓⴳⴳⵯⴰⵔ ⵏ ⵜⴼⵙⵓⵜ ⵉ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⵜⴰⵎⵖⵔⵉⴱⵉⵜ, ⵙⴳ ⴰⴽⵡⴰⵙ ⴰⵔ ⴰⵙⴰⵎⴰⵙ ⴳ ⵡⴰⵢⵢⵓⵔ ⴰⴷ ⴳ ⵜⵖⵔⵎⵜ ⵏ ⵜⴼⵔⴰⵡⵜ, ⴷⴷⵓ ⵜⵎⴰⵜⴰⵔⵜ « ⴰⴷⵔⴰⵔ ⴷ ⵙⵙⵉⵏⵉⵎⴰ ».

ⵉⴳⴰ ⵡⵏⵎⵓⴳⴳⵯⴰⵔ ⴰⴷ ⵢⴰⵏ ⵓⵏⵎⵓⵇⵇⴰⵕ ⵏⵏⴰ ⵉⵜⵜⵉⵍⵉⵏ ⴽⵓ ⴰⵙⴳⴳⵯⴰⵙ ⴳ ⵜⵖⵔⵎⵜ ⵏ ⵜⴼⵔⴰⵡⵜ ⵢⴰⵜ ⵜⵎⵍⴷⴰ ⵉ ⵓⴼⵙⴰⵔ ⵏ ⵜⵓⴳⵜⵜ ⵏ ⵉⵙⵓⵔⴰ ⵉⵎⴰⵣⵉⵖⵏ ⴳ ⵜⵙⴳⴳⵉⵡⵉⵏ ⴰⴽⴽⵯ ⵏ ⵜⵎⵓⵔⵜ ⵏⵏⵖ,ⴷ ⵔⴰⴷ ⵜⵉⵍⵉ ⵢⴰⵜ ⵜⵎⵣⵉⵣⵣⵍⵜ ⵜⴰⵏⴰⵎⵓⵔⵜ ⴷ ⵢⴰⵏ ⵓⴽⴰⴱⴰⵕ ⵏ ⵙⵙⵉⵏⵉⵎⴰ ⵏⵏⴰ ⵔⴰⴷ ⵉⵜⵜⴰⵡⵙⴽⴰⵔ ⴳ ⵉⴹⵓⵕⴰⵏ ⵏⵏⴰ ⵙⵙⵓⵜⵍⵏⵉⵏ ⵉ ⵜⵖⵉⵡⴰⵏⵜ ⵏ ⵜⴼⵔⴰⵡⵜ.

ⵔⴰⴷ ⵜⵜⴰⵡⵙⴽⴰⵔⵏⵜ ⴰⵡⴷ ⵜⵉⵙⵙⵓⵜⵍⵉⵏ ⵏ ⵓⵙⵎⵓⵜⴳ ⵜⵉⴷⵍⵙⴰⵏⵉⵏ ⴷ ⵜⵥⵓⵔⴰⵏⵉⵏ, ⴷ ⵢⴰⵜ ⵜⵎⵣⵉⵣⵣⵍⵜ ⵏ ⵉⵙⵓⵔⴰ ⴳⵣⵣⵓⵍⵏⵉⵏ ⵏ ⵡⵉⵏⵏⴰ ⴱⵃⵔⴰ ⵙⵙⵏⵜⴰⵏⵉⵏ ⴳ ⵉⴳⵔ ⵏ ⵙⵙⵉⵏⵉⵎⴰ.

ⵉⴳ ⵓⵎⵓⵙⵙⵓ ⴰⴷ ⵢⴰⵜ ⵜⵎⵍⴷⴰ ⵏⵏⴰ ⵖ ⵔⴰⴷ ⵎⵎⴰⴳⴳⴰⵔⵏ ⴰⵢⵜ ⵜⴼⵔⴰⵡⵜ ⴷ ⵜⵓⴳⵜⵜ ⵏ ⵉⵏⴰⵥⵓⵕⵏ ⵉⵎⴰⵣⵉⵖⵏ ⴷ ⵡⵉⵢⵢⴰⴹ ⴰⴼⴰⴷ ⴰⴷ ⴷⵉⵙⵏ ⴷⵔⵓⵏ ⵜⴰⵢⵔⵉ ⵏ ⵜⵥⵓⵕⵉ ⵏ ⵙⵙⵉⵏⵉⵎⴰ ⵎⵔⴰⵔⴰⵏ ⴷⵉⴷⵙⵏ ⴰⵡⴰⵍ ⴼ ⵜⵓⴳⵜⵜ ⵏ ⵉⵙⵏⵜⴰⵍ ⵉⵣⵓⵔⴰⵏⵏ.

ⵜⵏⵏⴰ ⵜⵎⵀⵍⴰ ⵏⵏⴰ ⵉⵙⵏⵎⴰⵍⴰⵏ ⴰⵏⵎⵓⴳⴳⴰⵔ ⴰⴷ ⴳ ⵉⵏⴰⵡ ⴰⵏⴰⵖⵎⴰⵙⴰⵏ ⵏⵏⵙ ⵎⴰⵙ ⵜⵕⵥⵎ ⵢⴰⵜ ⵜⵎⵃⵉⵣⵡⴰⵔⵜ ⵏ ⵓⴷⵔⴰⵡ ⵉ ⴽⵓ ⵎⴰⴷ ⵉⵔⴰⵏ ⴰⴷ ⴳⵉⵙ ⵢⴰⵡⵙ ⵙ ⵉⵙⵓⵔⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ,ⵏⵏⴰ ⵎⵓ ⵉⴳⴰ ⵓⵙⵏⵜⵍ ⵏⵏⵙⵏⵜ ⵡⵉⵏ ⵜⵏⴼⵍⵉⵜ ⴷ ⵜⴷⵍⵙⴰ ⴳ ⵜⵖⵔⵎⵜ ⴰⴷ , ⵉⴳ ⵓⵡⵜⵜⴰⵙ ⵏⵏⴰ ⵜⵙⵔⵙ ⴰⴷ ⵉⵜⵜⵓⵙⴽⴰⵔ ⵢⴰⵏ ⵓⵙⵓⵙⵏ ⵉ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⵙ ⵓⵎⴰⵜⴰ ⴰⴼⴰⴷ ⴰⴷ ⵜⵖⵉ ⴰⴷ ⵜⵍⴽⵎ ⵢⴰⵏ ⵓⵙⵡⵉⵔ ⵢⴰⵜⵜⵓⵢⵏ ⴳ ⵓⴳⴰⴷⴰⵣ ⴷ ⵉⴳⵔ ⵏ ⵓⵣⵓⵣⵣⵔ ⵏⵏⵙ.

ⵉⴳ ⵓⵡⵜⵜⴰⵙ ⵏⵏⵙ ⵓⵍⴰ ⴰⴷ ⵜⴼⴽ ⵜⴰⵎⵍⴷⴰ ⵏ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵜⵔⵎⵉⵜⵉⵏ ⴳⵔ ⵡⵉⵏⵏⴰ ⵙⵙⵏⵜⴰⵏⵉⵏ ⴳ ⵉⴳⵔ ⴰⴷ ⴷ ⵉⵡⵡⵓⵔⴰⵏⵏ ⵏ ⵙⵙⵉⵏⵉⵎⴰ ⵜⴰⵎⵖⵔⵉⴱⵉⵜ.

ⴰⵢⵏⵏⴰ ⵉⵥⵍⵉⵏ ⵙ ⵜⴰⵢⵎⵓⵏⵜ ⵏⵏⴰ ⵔⴰⴷ ⵉⵙⵜⵉ ⵉⵙⵓⵔⴰ ⵏⵏⴰ ⵖⵓⴷⴰⵏⵉⵏ ,ⵍⵍⴰⵏ ⴳⵉⵙ ⴽⵕⴰⴹ ⵉⴳⵎⴰⵎⵏ ⵏⵏⴰ ⵜⵙⵔⵓⵙ ⵜⵎⵀⵍⴰ ⵏ ⵓⵏⵎⵓⴳⴳⴰⵔ ⵉ ⵜⵏⴰⴼⵓⵜ ⴰⴷ ,ⴳⵉⵏ ⵉⵎⵙⵜⴳⴳⴰⵔⵏ ⴷ ⵉⵡⵡⵓⵔⴰⵏ ⵏ ⵉⴳⵔ ⵏ ⵙⵙⵉⵏⵉⵎⴰ ⵜⴰⵎⵖⵔⵉⴱⵉⵜ ⵜⴰⵎⴰⵣⵉⵖⵜ.

ⵉⵍⵉⵏⵜ ⵜⵙⵎⵖⵓⵔⵉⵏ ⴱⴰⵀⵔⴰ ⵙⵜⴰⵡⵀⵎⵎⴰⵏⵉⵏ ⵉ ⵡⴰⵏⵏⴰ ⴷ ⴷⴰⵔ ⴰⴼⴰⵔⵙ ⵉⵥⵉⵍⵏ ⵏⵏⴰ ⴳ ⵍⵍⴰⵏⵜ ⵜⴼⴰⴷⵉⵡⵉⵏ ⵏ ⵜⵡⵡⵓⵔⵉ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⴷ ⵜⴰⵏⵏⴰ ⵜⵙⵜⵉ ⵜⴰⵢⵎⵓⵏⵜ ⴰⴷ.

ⴳ ⵓⵏⵢⴰⵍⴽⴰⵎ ⵏⵏⵖ ⴷ ⴽⵔⴰ ⵏ ⵉⵏⵓⵥⴰⵕ ⴷ ⵉⵙⴽⴱⴰⵕⵏ ⵉⵎⴰⵣⵉⵖⵏ ⵏⵏⴰ ⵢⵉⵡⵙⵏ ⴳ ⵜⵙⵙⵓⵜⵍⵜ ⵏ ⵓⵏⵎⵓⴳⴳⴰⵔ ⴰⴷ ⵏⵉⵜ ⵏⵏⴰ ⵉⵜⵜⵓⵙⵏⵎⴰⵍⴰⵏ ⴰⵙⴳⴳⵯⴰⵙ ⵉⵣⵔⵉⵏ , ⵏⵏⴰⵏ ⵎⴰⵙⴷ ⵜⴳⴰ ⵜⵉⵔⵎⵉⵜ ⴰⴷ ⵢⴰⵜ ⵜⵉⵔⵎⵉⵜ ⴱⴰⵀⵔⴰ ⵉⵥⵉⵍⵏ,ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴰⵢⵙⵏ ⵜⴰⴽⴽⴰ ⵜⴰⵎⵍⴷⴰ ⴰⴼⴰⴷ ⴰⴷ ⵎⵎⴰⴳⴳⴰⵔⵏ ⴷ ⵉⵏⵓⵥⴰⵕ ⵢⴰⴷⵏⵉⵏ ⵏ ⵙⵙⵉⵏⵉⵎⴰ ⵜⴰⵎⵖⵔⵉⴱⵉⵜ ,ⵎⵔⴰⵔⴰⵏ ⴷⵉⵙⵏ ⴰⵡⴰⵍ ⴼ ⵜⵓⴳⵜⵜ ⵏ ⵜⵖⴰⵡⵙⵉⵡⵉⵏ ⵏⵏⴰ ⵔⴰⴷ ⵉⴼⴽ ⵜⴰⵡⵀⴰⵍⵜ ⵉ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⴰⴼⴰⴷ ⴰⴷ ⵜⴱⵓⵖⵍⵓ ⵙ ⴷⴰⵜ.

Dernière modification : 25 ⵉⴱⵔⵉⵔ 2019
Source URL: https://preprod.mapnews.ma/am//actualites/%E2%B5%9C%E2%B4%B0%E2%B4%B7%E2%B5%8D%E2%B5%99%E2%B4%B0/%E2%B4%B0%E2%B5%8F%E2%B5%8E%E2%B5%93%E2%B4%B3%E2%B4%B3%E2%B5%AF%E2%B4%B0%E2%B5%94-%E2%B5%8F-%E2%B5%9C%E2%B4%BC%E2%B5%99%E2%B5%93%E2%B5%9C-%E2%B5%89-%E2%B5%99%E2%B5%99%E2%B5%89%E2%B5%8F%E2%B5%89%E2%B5%8E%E2%B4%B0-%E2%B5%9C%E2%B4%B0%E2%B5%8E%E2%B4%B0%E2%B5%A3%E2%B5%89%E2%B5%96%E2%B5%9C-%E2%B4%B3-%E2%B5%9C%E2%B4%BC%E2%B5%94%E2%B4%B0%E2%B5%A1%E2%B5%9C